Дата публикации: 2008-06-04 13:53:08

Хасен Қожа-Ахмет «Халық кеңесі» қоғамдық парламентіне

[345/2]

«Халық кеңесі» қоғамдық парламентінің Регламент жобасын әзірлеу тобына Қазақстанның «Азат» қозғалысынан

ҰСЫНЫСТАР

1. «Халық кеңесі» ҚП қатарына қосылуға ниет еткен азамат кемінде саяси я әлеуметтік маңызы бар екі ұсынысымен келуге тиіс;

2. Бүгінгі күнде «Қазақстан Республикасының мемлекеттік тілі туралы» жаңа заңының үш жобасы жұртшылыққа ұсынылып отыр («Ұлт тағдыры» қозғалысының, «Әділет» партиясының, үкімет жобасы). ҚП осы жобаларды талқылап, қазақ тілі шын мәнісінде мемлекеттік тіл міндетін атқара алардай заң жобасын жасап ҚР парламентіне ұсынса;

3. Елімізде империялық саясаттың соғысына қатысқандарға арналған заңдар болғанымен Қазақстанның тәуелсіздігі үшін күресіп сүргінге ұшыраған азаматтарға арналған заң да, статус та жоқ. Ондай азаматтар «Жаппай саяси қуғын-сүргін туралы» заңға енгізіліп, департацияланған, жаламен жазаға ұшырағандармен бір деңгейге қойылған. «Қазақстанның тәуелсіздігі үшін еш қазақ күреспеген екен» деген пікір қалыптаспау үшін Қазақстан тәуелсіздігі үшін саналы түрде күресіп зардап шеккен азаматтарға арнайы заң жобасын жасасақ;

4. Конференциялар мен БАҚ-да «Желтоқсан көтерілісі» деп айтылып, неліктен «көтеріліс» делінуі қажет екеніне көптеген дәлелдер келтірге-німізбен Қазақстан билігі әлі ресми түрде бұл бағаны бекітпей келеді. ҚП бұл мәселе бойынша да өз тұжырымын жасап, КР үкіметіне жолдаса;

5. Қазақ КСР Жоғарғы Кеңесінің 24.09.1990 ж. Қаулысында 1986 жылғы Желтоқсан көтерілісіне байланысты халықты жаппай саяси репрессияға ұшыратуға кінәлі лауазымды қызметкерлердің аты-жөндері аталған еді. Олардың әлі күнге дейін неліктен жауапқа тартылмауы себебін ҚП арнайы комиссия құру арқылы зерттеп, халыққа жария етсе;

6. «Көк байрақ» (2005 ж№ 6-7), «Қазақ әдебиеті» (2007 ж. № ) газеттерінде жарияланған «Зиялы кім, зиянды кім?» деген мақаламда қазақтың шығармашылық қауымын өз еңбектерінің жемісімен өмір сүргізіп, билікке материалдық кіріптарлықтан жағымпазданудан құтқару үшін Ресейлік басылымдар тасқынын тоқтатуды ұсынған едім. Тексеріп көргенімде, мұндай рухани отарлауға кімдер жол ашып отырғанын тиісті мекемелер де білмейтін боп шықты. ҚП комиссия құрып бұл мәселенің жұмбағын ашса;

7. «Қазақ әдебиеті» газетінің 2007 жылғы он алты санында қазақтың ұлттық музыкалық өнерінің, сондай-ақ қоғамымыздағы жалпы музыкалық мәдениетіміздің жайын зерттеп жазған екі еңбегім жарияланып, онда өнерімізде орын алып отырған келеңсіздіктерді шешудің жолдарын, «Қазақ музыкасы департаментін» ашуды үкіметке ұсынған едім. Жауапсыз қалған сол ұсыныстарымды ҚП болып қолға алып көрсек;

8. Кезінде КСРО Конституциясының 6-бабында коммунистік партияның мемлекеттегі жетекші рөлі бекітіген еді. Ал Қазақстан Конституциясында «НұрОтан» үшін ондай бап болмаса да және қоғамдық ұйымдар мен мемлекеттік мекемелердің бір-бірінің жұмыстарына араласпауы туралы заң бола тұра «НұрОтан» партиясы өз жұмыстарын атқартуға мемлекеттік мекемелерді жұмсап отырғанына куә болудамыз. Бүгін полиция қызметкерлерін «жемқорлықпен күрес» деген науқанына пайдаланып «репетициядан» өткізген «НұрОтан», ертең бұл мекемелерді өзге идеялы партиялар мен жеке азаматтарды жаппай репрессиялауға жұмсауы да мүмкін. Сондықтан ҚП «НұрОтан» партиясының елдегі билікті басып алуына қарсы шұғыл түрде халыққа мәлімдеме жасауға тиіс;

9. ҚП өз жұмыс жоспарына ҚР Қылмыстық кодексінің жаңа жобасын жасау мәселесін де енгізгені жөн. Өйткені, Қазақ КСР Қылмыстық кодексінде 256 бап болып, ең ұзақ жаза мерзімі 15 жылдан аспаған болса, ал қазір «демократиялық қоғамбыз» дей тұра Қазақстан криминалды мемлекетке айналғандай, Қылмыстық кодекс бабтарының саны 400-ге жетіп, ал адамдарды бас бостандығынан айыру мерзімі 30-40 жылға шарықтаған. Жазалау мәселесінде «әлемдік стандартқа» еліктеген үкіметіміз еліміздің тергеу, сот мекемелеріндегі жаппай жемқорлықты, абақтыларымыздың күйінің АҚШ, Евроодақ стандарттарына маңайламайтынын мүлде ескермеген...

Алдағы уақыттарда «Азат» қозғалысы сіздерге өзге де ұсыныстарын жасайды.

20.05.2008 ж.
ҚА «Азат» қозғалысының төрағасы Х.К.Қожа – Ахмет

Оставить комментарий

Имя [аноним / ввести пароль]


Заголовок сообщения


Текст сообщения



Введите код, который вы видите на изображении

Комментарии пользователей

1 Anonymous Аноним	Ср Июн 04, 2008 16:32   Қолдаймыз,
2 Anonymous Аноним	Вт Июл 01, 2008 02:20   Өте өзекті әрі шешімін күттіртпейтін проблемалар